KUHLOMULE osomabhizinisi abasafufusa embukisweni wosomabhizinisi iDBF
Image: SITHUNYELWE
KUHAMBE ngamagama enkehli embukisweni wosomabhizinisi waminyaka yonke iDurban Business Fair ebisenxanxatheleni yezitolo iBridge City, KwaMashu, ngoLwesihlanu kuya ngeSonto, njengoba kuhlomule abantu abasha basemalokishini ngamathuba ehlukene.
Kulo mcimbi obekuhlangene kuwona abatshalimali, amakhasimende, yizikhungo zemfundo ezahlukene nosomabhizinisi - oningi labo ngabasafufusa, bekuhlangane abantu abangaphezu kwa-9 000 ngenhloso yokufukulana emikhakheni ehlukene abakuyona.
Okuqapheleke embukisweni walo nyaka wukuthi kubekwe eqhulwini ukuhlomisa osomabhizinisi ngamathuba emfundo, njengoba uMasipala weTheku ubambisane nesikhungo sezemfundo esizimele, iNew Bridge Graduate Training Institute, ngenhloso yokuhlomulisa osomabhizinisi abawu-10 abaneminyaka ephakathi kwa-18 kuya ku-35 ngomfundaze wezifunzo ze-Business Administration i-NQF Level 5.
Omunye walabo somabhizinisi abawu-10 abahlomule kulolu hlelo, olunikezela ngomfundaze wokufunda ka-R50 000 osomabhizinisi ngamunye, kube wuNksz Thandeka Ntombela waseNtuzuma, othe leli thuba lizoyishintsha kakhulu impilo yakhe futhi ubona lizoba wusizo ngamacebo azomsiza ukuthi aqale ibhizinisi lakhe ngomuso.
Enye yezimenenja zaseNew Bridge Graduate Training Institute uMnuz Nathi Ndlovu ugcizelele ukuthi lolu hlelo lungenye yezindlela abaphosa ngayo itshe esivivaneni ukusiza ukuthi intsha icijeke emakhonweni azosiza ukuthi ikwazi ukufukula umnotho wesifundazwe.
UNdlovu uthe laba abawu-10 abahlomule kulolu hlelo bazoqala izifundo zabo ngoJuni, nonyaka, ophikweni lwabo olusePinetown noluseMusgrave, eThekwini.
Okunye okuhlabahlosile okwenzeke kulo mcimbi wumbuthwano wokuthekela ulwazi lwamathuba emboni yezokwakkha, iConstruction Development Indaba okuvulwe umcimbi ngayo ngoLwesihlanu, kwaba ngowokucobela abesifazane ngolwazi lwamabhinisi emikhakha eyahlukene, obungoMgqibelo iWomen Economic Empowerment.
Kuwo lo mcimbi iJunior Chamber Internatonal yethule ngokusemthethwnei omunye umcimbi, i-Africa and Middle East Conference ozoba seThekwini, ngoMeyi 21 no-22.
Usihlalo wekomiti lophiko lwezokuthuthukisa umnotho nokuhlela, iKhansela uThembo Ntuli, uthe bajabule ngokuthi balokhu beqhubeke njalo ukwenza izinhlelo ezizothuthukisa osomabhizinisi abasafufusa, okuzosiza ukufukula umnotho wesifundazwe nomphakathi.