Aaron Motsoaledi
Image: SIGCINIWE
UKUQHUBEKA nokubhoka kwesifo sofuba esiqhubeka nokubulala inqwaba yabantu emhlabeni jikelele kubalwa neNingizimu Afrika, ngesinye sezizathu ezinqala ezenze iziphathimandla zezempilo kuleli zanquma ukuhlangana namanye amazwe anale nkinga ukucwaninga ngokuthi kungenziwanjani ukuzama ukusinqoba.
Lokho kudalulwe wuNgqongqoshe wezeMpilo ezweni uDkt Aaron Motsoaledi, esithangamini nabezindaba abesiseSandton, eGoli izolo. Uzwakalise ukukhathazeka ngokuthi leli zwe likwayisikhombisa abhekene nengwadla yalesi sifo - okukhona kuwona iZambia, Malawi, Kenya, Mozambique, Indonesia neVietnam.
“Lezi yizindaba ezimbi kakhulu nezidinga ukuthi kube khona okwenziwayo ukuzilungisa, yingakho sesinqume ukuhlangana nala mazwe ukubheka ukuthi singabambisana kanjani ukucwaninga, siqhamuke nezixazululo zokuzama ukunqoba lesi sifo, nokwenza ukuthi isimo sibe ngcono - esibheke ukuthi imizamo yesizokwenza manje ibe isiqala ukuthela izithelo ngo-2027 uma sesikhipha umbiko wokuqala wesizobe sesikwenzile,” kusho uMotsoaledi.
Eqhuba, uthe kuyakhathaza ukuthi isifo sofuba sisalokhu siqhubeke njalo nokubhebhetheka, njengoba ucwaningo lwabezempilo lusanda kubavezela ukuthi u-80% wabantu abashone benengculazi, bafa ngenxa yokuhaqwa yisifo sofuba.
“Lesi yisifo esiqhubeka nokuba yingozi emphakathini wethu nasemhlabeni jikelele ukwedlula zonke izifo ezikhona. Umehluko nje wukuthi asifani nezinye ngokuthi asigqamile futhi asinakekile, kanti okunye futhi okufana nokuthela upelepele esilondeni wukuthi kusenzima kwabezempilo ukuthola umgomo wokusidambisa nokusithiba ukuze singabi namandla azosenza sibe yingozi, njengoba kwenzeka kunqandwa ukudlebeleka kwegciwane iCovid-19 eminyakeni emihlanu edlule,” usho kanje.
Ungqongqoshe ukhuthaze abantu ukukhuthalela ukuhlolwa lesi sifo, bengalindi ukuthi umuntu aze agule kakhulu kuyikhathi ethatha izinyathelo umonakalo usumkhulu kakhulu.