USomlomo wePhalamende uNkk Thoko Didiza
BAMVALELE ekhoneni uSomlomo wePhalamende uNkk Thoko Didiza, abeMK nabe-EFF, befuna izimpendulo zokuthi uzoqala nini ukusebenza umthetho wezikole okunemvunge ngawo, iBela osayinwe nguMengameli Cyril Ramaphosa ngenyanga edlule.
La maqembu akhale ngokuthi akukwazi ukuthi kungavunyelwa i-DA, ichachaze emakhanda amanye amaqembu ePhalamende ngoba ingeneme ngokuthile.
Uzame kaningi ukubhula umlilo uNkk Didiza emhlanganweni wayizolo wekomiti lokuhlela ukusebenza kwePhalamende, elihlanganisa nephini lakhe, osotswebhu bawo wonke amaqembu nezikhulu zePhalamende ezihlanganisa nezazi zomthetho.
Usotswebhu weMK uMnuz Mzwanele Manyi, uthe uNgqongqoshe weMfundo eyisiSekelo, uNksz Siviwe Gwarube, owaduba ukuba yingxenye yokusayinwa komthetho, namanje akakagaguli ukuthi umthetho uqala nini ukusebenza.
“Akumele sibanjwe ngobhongwane yi-DA, ngoba ingeneme ngezinto ezithile bese imisa nse yonke into. Lo mthetho wasayinwa yiPhalamende lehlandla lesithupha, kumele ngabe usuyasebenza kodwa dololo.”
Uthe kuyacaca ukuthi nangomuso eminye imithetho izoma nse, ngenxa yokuthi i-DA ayeneme.
UNksz Hlengiwe Mkhaliphi we-EFF, ukhale esifanayo wathi ngokomthetho kumele ngabe lo mthetho usuyasebenza.
“Sifuna ukwazi ukuthi umengameli usebenzise siphi isigaba soMthethosisekelo, ukusayina bese emisa okwesikhashana izigatshana ezithile zomthetho? Abantu bakuleli okubalwa nayo i-DA baba yingxenye yohlelo lwezigcawu iPhalamende lehla lenyuka lifuna izethulo kodwa manje asazi kubambephi. Sizwa kuthiwa kuzolindwa izinyanga ezintathu kusabhekwa lezi zigaba, yimuphi umthetho ovuna lokhu?” kubuza uNksz Mkhaliphi.
UManyi uthe bafuna uNksz Gwarube azochaza ngaphambi kwaleli komiti.
UMnuz Nqabayomzi Kwankwa we-UDM, uthe uma umthetho ususayiniwe alikho iqembu okumele libukeke sengathi linamandla ngokuthi likhale ngezinto ezithile bese kumiswa yonke into.
“Asikho isidingo sokuthi kube nokubambezeleka ngenxa yokuthi umthetho wasayinwa. Ngiyavumelana nozakwethu ukuthi kumele ngabe usuqalile ukusebenza.”
UNkk Didiza uze wabiza oluleka uRamaphosa kwezomthetho ePhalamende, uDkt Willem Koornhof, othe kusabhekwa izigatshana ezithile kodwa umthetho wasayinwa.
Uthe umengameli ubuka izinto ezimbili ngaphambi kokuphasisa umthetho okungukuthi kulandelwe yonke imigudu yasePhalamende nokuthi uyahambisana yini noMthethosisekelo wezwe.
“Zombili lezi zigaba zaphasa, yingakho wasayinwa. Ungqongqoshe nguyena okumele azise umengameli ukuthi uzoqala nini ukusebenza umthetho ngoba usuphasisiwe. Lo mthetho awubuyeli ePhalamende, ngoba wasayinwa.”
UNkk Didiza uthe abakwazi ukubiza ungqongqoshe ngoba umsebenzi wekomiti lezemfundo lowo.