Ibuyele endaweni yesibili ngokuba yinkampani edayisa kakhulu eNingizimu Afrika iVolkswagen Group Africa ebese yedlulwa yiSuzuki Auto South Africa.
Ngokwezibalo zokudayisa kwezimoto ezintsha ezikhishwa yi-naamsa, iSuzuki yagudluza iVolkswagen (ehlanganisa iVW ne-Audi) ngo-Ephreli. ISuzuki yadayisa izimoto ezingu-4 891 kwalandela iVolkswagen ngo-4 785.
Ngokwezibalo zangoMeyi iVolkswagen idayise izimoto ezingu-4 939 kwathi iSuzuki yadayisa ezingu-4 101.
Endaweni yokuqala iToyota iyaqhubeka nokuzihambela yodwa njengoba idayise ezingu-8 795.
Sezizonke izimoto ezintsha ezidayise kuleli ngoMeyi zingu-37 105. I-naamsa ithe lesi yisibalo esehle ngo-6 137 noma u-14.2% uma kuqhathaniswa no-43 242 owadayiswa ngoMeyi 2023.
Izimoto ezidayise ngaphandle zona zibe ngu-24 235. Lokhu kukhombisa ukwehla ngo-5 712 noma u-19.1% uma kuqhathaniswa nezingu-29 947 ezahamba ngesikhathi esifanayo nyakenye.
Ngo-Ephreli imboni ibijabulela ukunyuka kwezibalo uma kuqhathaniswa nowonyaka odlule nokube yinto yokuqala ezinyangeni eziyisishiyagalombili kulandelana ngoba bezilokhu zehla uma kuqhathaniswa neminyaka edlule.
I-naamsa ithe uvalo lokhetho lukahulumeni kazwelonke nezifundazwe obelungoMeyi 29 lusheshe lwayiqeda leyo njabulo ngoba kungenzeka ukuthi kumise abantu ukuthi bathenge izinto ezinkulu njengemoto. Uthe okunye okube nomthelela yiholidi.
Ithe okuhle kodwa wukuthi ukucinywa kukagesi okuhleliwe kuyaqhubeka nokungenziwa, intengo kawoyela iphansi nokuyinto esiza imboni yezokukhiqiza.
Nalu uhla lwezinkampani ezidayise kakhulu kuleli ngoMeyi:
Toyota – 8 795
Volkswagen Group – 4 939
Suzuki Auto – 4 101
Ford Motor Company – 2 860
Hyundai Auto South Africa – 2 185
Isuzu Motors South Africa – 1 626
Chery Auto South Africa – 1 609
Nissan – 1 552
GWM SA – 1 205
Renault – 1 110
BMW Group – 1 068
Kia South Africa – 1 003
Mahindra – 941
Stellantis – 515
Mercedes-Benz SA – 478