UMHOLI webandla i-Ekuphileni Power of God Ministries, uZamokwakhe ‘King Bhaka’ Nzama ozoba nenkonzo yokuqala yePhasika, eNgilanyoni, eMid Illovo Isithombe: SITHUNYELWE
UMHOLI webandla i-Ekuphileni Power of God Ministries, uZamokwakhe “King Bhaka” Nzama uthembisa ukuthi kuzovuka izishosha ngenkonzo yePhasika ezoba seKing Bhaka Nzama Dam, eNgilanyoni, eMid Illovo.
UKing Bhaka uthe kuzobe kungokokuqala eyisa inkonzo yePhasika kule ndawo njengoba zonke izinkonzo zivamise ukuba semzini wakhe oseHillary.
“Inkonzo iyoqala ngoLwesihlanu ize iphele ngeSonto. NgoLwesihlanu kuyobe kuyinkonzo ejwayelekile okuvumeleke wonke umuntu ukuthi abe kuyona. NgoMgqibelo kuzobe kuyisigaba sesibili senkonzo esizobe sihlanganise umsebenzi wokuphilisa abantu. Ngalolu suku kuzobe kumatasa kakhulu ngoba sizobe siphilisa abantu, sisebenza abantu abanoMakhandakhanda Oil. Akuzogcina lapho kodwa abantu bazophinde bazitike ngomculo njengoba kuzobe kukhona abaculi bowokholo esizobadalula ngokuhamba kwesikhathi ngokunjalo nabazophatha uhlelo,” kusho uKing Bhaka.
Uthe wonke umuntu wamukelekile futhi kuzobe kungenwa mahhala njengoba inhloso kuzobe kuyinkonzo yePhasika.
Uveze ukuthi abantu bangakubo abangeke bahambe namabandla abo ukuya ePhasikeni, bangeza eKing Bhaka Nzama Dam njengoba kuzobe kwamukeleke wonke umuntu kungakhathalekile ukuthi ukuliphi ibandla.
Kule ndawo uKing Bhaka wake wenza umcimbi owawuhlanganise abaculi beminxa ehlukene ngesikhathi egubha usuku lwakhe lokuzalwa ngo-Okthoba nyakenye.
Uthe nakulo nyaka uzophinde abe nomgubho wosuku lwakhe lokuzalwa kuyona le ndawo njengoba kuyiyona asehlele ukuthi ayenzele kuyona imicimbi emikhulu.
Kumanje wakha isithabathaba sendawo yokuphola kule ndawo futhi uhlose ukuthi kufike iPhasika isiphelile ukuze abazobe beze khona bangabi nenkinga yokunethwa yimvula uma kwenzeka lina ngalesi sikhathi.
Related Topics: