Ukuqokwa kukaZungu eMUT kuqinisa ithemba

KUSASA wusuku olukhulu futhi olukhethekile enyuvesi yaKwaZulu-Natal, iMangosuthu University of Techonology (MUT) eseMlaza, njengoba kuzobe kubekwa ushansela wayo omusha, uMnuz Sandile Zungu.

Okwenza ukungeka esikhundleni kukaZungu, owuqweqwe lukasomabhizinisi, kube ngokukhethekile wukuthi njengoba le nyuvesi iseMlaza, naye uManzini ukhule kulo leli lokishi elingelikhulukazi esifundazweni.

Lokhu sikubona kungekhona nje ukuqondana kwezinto kepha sibona kuyithuba lokuthuthuka kwentsha nomphakathi owakhele iMUT njengoba ushansela wayo omusha eliqonda kahle leli lokishi nezinselelo zalo.

Ukuba khona kwenyuvesi phakathi elokishini, akufanele kuhlomulise nje kuphela izitshudeni ezifunda kuyo.

Umphakathi kumele nawo kube khona okuhlomulayo njengoba le nyuvesi ingeyobuchwepheshe futhi idume ngokukhiqiza amakhono, ikakhulukazi kwezobunjiniyela.

Ukuqokwa kukaZungu kwesobushansela kuyalenyusa ithemba lokuthi kule nyuvesi zizokwanda izinhlelo ezizobandakanya futhi zihlomulise umphakathi.

Siyahambisana nathi nombono kaManzini, awuveze engxoxweni abe nayo neSolezwe, wokuthi izikhungo zemfundo ephakeme kumele zibe ziyizizinda zokucobelela ngolwazi nokuhlomulisa umphakathi.

Siyawubongela umphakathi waseMlaza ngokuba nenyuvesi elokishini, enoshansela odabuka kulo leli lokishi futhi onamava angethandabuzwe kwezamabhizinisi nokuthuthukisa umphakathi.

Siyambongela naye uZungu kwesobushansela futhi simfisela inhlanhla.

Siyethemba ukuthi ukungena kwakhe kuzokwelelekela nasekuxazululeni izinkinga isikhungo esibhekene nazo.

Amaqhinga nobuhlakani bakhe sengathi kungabeka le nyuvesi, izitshudeni nomphakathi waseMlaza ezingeni elithe thuthu.