UMongameli waseFrance uEmmanuel Macron umemelela ukuba naluphi na utyalo mali oluya eMelika lunqunyanyiswe.
Image: XOSE BOUZAS / Hans Lucas / AFP
UMongameli welizwe laseFrance uEmmanuel Macron umemelele iinkampani zaseYurophu ukuba zirhoxise utyalo mali olujoliswe kwilizwe laseMelika.
Oku kusemva kokuba uMongameli welizwe laseMelika uDonald Trump edize ukuba iza kunyuka ngamandla irhafu kwiimveliso ezingena kwela lizwe ezisuka kwamanye amazwe.
"Kubalulekile okokuba sinqumamise lonke utyalo mali olujoliswe kwela lizwe laseMelika okwangoku, oku kuza kuqhubeka de kuhlaliswe phantsi kusonjululwe ukungaboni ngasonye okuphakathi kwamazwe aseYurophu neMelika," kutsho uMacron.
UMongameli Macron uthethe oku ngethuba ebesenza intetho yakhe kwabezorhwebo noshishino kwilizwe laseFrance.
Ukusukela oko engene esikhundleni sokongamela ilizwe laseMelika, uDonald Trump wenza iinguqu ezimtsalele amehlo eMelika nakwihlabathi.
Ezinye kwezonguqu zichaphazela ngamandla ilizwe laseMzantsi Afrika nathe wagxotha unozakuzaku walo uEbrahim Rasool. Owayesakuba nguMongameli kwela lizwe uBarack Obama sele eqalisile ukugxeka indlela aqhuba ngayo uTrump emtyhola ngokuba nguzwilakhe.
Ethetha nabantu basePennsylvania eMelika, uObama uthi ilizwe laseMelika lidinga inguqu ekhawulezileyo.
Kwelinye icala, abantu baseMelika batyhola uTrump ngokuba uqhubela phambili igumgedle lokuzityebisa yena kwakunye noogxa bakhe abaquka uElon Musk nezinye izityebi zehlabathi. UMzantsi Afrika uthumele igqiza eMelika ngelizama ukucenga ukuxolelana phakathi kwala mazwe mabini.
UTrump uxelelwe ulwazi olungeyonyani yimibutho yeli equka iAfriForum ngelithi uMzantsi Afrika uthatha umhlaba wamafama. Liyanda lona inani labantu namazwe achasene nendlela aqhuba ngayo uTrump nolawulo lwakhe.