Umbutho iDemocratic Alliance ngomnye wemibutho yezopolitiko echasa ukupasiswa kohlahlo lwabiwo mali.
Image: IOL graphic
UMongameli weDA uJohn Steenhuisen uthi uza kuwusa enkundleni umcimbi wokupasiswa kwesiphakamiso sokunyusa iValue Added Tax (VAT) yiPalamente yeli. Ukunyuswa kwerhafu (VAT) kupasiswe emva kokuba imibutho equka iANC, Action SA, IFP, Good, PAC, BOSA neUDM bethe baxhasa ukupasiswa kohlahlo lwabiwo mali olukhuthaza ukunyuka kwerhafu.
USteenhuisen uthi umbutho wakhe uza kwenjenjeya ukuya kwinkundla ephakamileyo yaseKapa nanjengoko bekholelwa ukuba inkqubo yokwenziwa kohlahlo lwabiwo mali ayikho mthethweni. Intetho yohlahlo lwabiwo mali ilibazisekile ngenxa yokuba imibutho equka iDA ibichase ukunyuswa kwerhafu ebikhuthazwa ngumbutho weANC.
Emva kokuba yenziwe intetho yohlahlo lwabiwo mali kuyanyanzeleka ukuba ivotelwe ngeenjongo zokuyipasisa ukuba yenziwe ngokuhambelana nomgaqosiseko.
Ziivoti ezilikhulu namashumi alithoba anesine ezithe zapasisa ukuqhutyelwa phambili kolu hlahlo lwabiwo mali, logama ikhulu elinamashumi asibhozo anesibini lingakhange livume ukuba iqhutyelwe phambili le nkqubo. Oku kubeka esichengeni urhulumente wendibanisela nalapho iDA ilihlakani eliphambili kuba ibikuchasile ukupasiswa kwale ntetho.
Othethe egameni likaMongameli weli, uVincent Magwenya, uthi ipasisiwe intetho yohlahlo lwabiwo mali, ngoko baza kuqhuba neenkqubo zabo. Isithethi seDA kuzwelonke, uKarabo Khakhau, uthi lihlazo ukupasiswa kolu hlahlo lwabiwo mali yiPalamente yeli.
"Olu luhlahlo lwabiwo mali oluchasene ngokucacileyo nempilo nentlalo yabantu abahluphekayo boMzantsi Afrika, siyazingca ngokuba ngowona mbutho ukuchasileyo ukupasiswa kolu hlahlo lwabiwo mali," kutsho uKhakhau.
Uninzi lugxeka iAction SA ngokuba ngowona umbutho uthengise ngabantu ngokuxhasa ukupasiswa kolu hlahlo lwabiwo mali. Ukanti iEFF kwelayo icala ithi ukupasiswa kolu hlahlo lwabiwo mali kubonisa ukuba akukho nto ingurhulumente wendibanisela eMzantsi Afrika. Oonokrawuzana bathi iANC ingahle isebenzisane neEFF neMK Party xa inokuphuma iDA kurhulumente wendibanisela ngenxa yokupasiswa kolu hlahlo lwabiwo mali.