Amaxabiso amafutha ehlile.
Image: Tumi Pakkies/Independent Newspapers
Oligosa eliphezulu kwiSebe lezimbiwa namandla kweli uRobert Maake uthi ukuhla kwexabiso lamafutha kweli kubangelwe kukuqina kwerandi kwakunye nokuhla kwexabiso leoyile ekrwada kwihlabathi. Amaxabiso amafutha aquka ipetroli, idizili kwakunye neparafini ehlile ukusukela ezinzulwini zobusuku ngomhla wokuqala wale nyanga kaTshazimpuzi.
Oku kwenza ukuba abathengi bamafutha babone umahluko xa befika kumaziko okugalela amafutha. Ixabiso lamafutha linegalelo elimandla kwimpilo yemihla ngemihla yoluntu loMzantsi Afrika. Eli xabiso linegalelo kwixabiso lokutya, imali yokuhamba kwabo basebenzisa izithuthi zikawonke wonke.
Ecacisa ngokuhla kweli xabiso uMaake uqinisekisa ukuba ngenene irandi yeli eyomeleleyo kwakunye nexabiso le oyile kwihlabathi ngunobangela woku.
"Isizathu sokuhla kweli xabiso kukuqina kwerandi yoMzantsi Afrika xa ithelekiswa nedola kanye ngeli xesha," kutsho uMaake.
Amafama nabezoshishino bafumana umahluko kwintengo yabo yamafutha aquka idizili nanjengoko uninzi loomatshini babo besebenzisa amafutha imihla ngemihla.
"UMphathiswa ukupasisile ukuthotywa kwamaxabiso ngeenjongo zokuba eli xabiso lihle ngokwahlukana kwala mafutha, idizili ihle ngeesenti ezingamashumi asibhozo anesithathu ilitha nangeesenti ezingamashumi asibhozo anesihlanu ilitha," kutsho uMaake.
Ixabiso lepetroli lona lihle ngeesenti ezingamashumi amahlanu anesibhozo ilitha kwakunye neesenti ezingamashumi asixhenxe anesibini ilitha. Iparafini neyenye yezinto ezisetyenziswa kakhulu kwintlalo yasezilalini yona ihle ngerandi kwakunye neesenti ezilishumi elinesine ilitha.