Umphathi wakwaVolvo uHakan Samuelsson.
Image: Volvo Cars
UHakan Samuelsson uqeshwe kwakhona njengomphathi yenye yeenkampani ezinkulu ezivelisa iimoto uVolvo emva kokuba ebethathe umhlalaphantsi ngo2022.
USamuelsson uqale ukusebenza kule nkampani ngo2012 nathe wayeka ukusebenza ngonyaka ka2022, eshiya umzila omhle.
Inkampani yakwaVolvo kwihlabathi ithathe isigqibo sokubuyisela uSamuelsson emva kokuba izinto zingahambi kakuhle phantsi kolawulo lukaJim Rowan obebambe iintambo kule nkampani.
Uninzi lweenkampani zeemoto ehlabathini zisengxakini ngenxa yokukhawuleza kwezinga lokuveliswa kweemoto ezihambelana nala maxesha.
URowan ushiye inkampani yakwaVolvo ngomhla wokugqibela wenyanga yoKwindla eshiya izinto zingentlanga ngokwengeniso okanye izinga lokuthengiswa kweemoto.
"USamuelsson uza kusebenza isithuba seminyaka emibini kuphela logama inkampani iza kuba ikhangela ubani oza kungena endaweni yakhe," itsho ingxelo yakwaVolvo.
USihlalo wakwaVolvo kwihlabathi, uEric Li, uthi baqinisekile ukuba bathathe isigqibo esifanelekileyo ngokuqesha uSamuelsson kwakho. "Sichulumancile ngokuba siqeshe uSamuelsson kwakho njengomphathi wenkampani yethu, siyawazi umsebenzi wakhe nendlela asebenza ngayo," kutsho uEric Li.
Uthi iinguqu ezenzeka kwihlabathi zinyanzelisa ukuba kukhangelwe amadoda namakhosikazi akwazi ukuhamba ngesantya esiphezulu. "Ubuyela kuthi uSamuelsson equlethe amava, ulwazi nezakhono ezimbaxa kwimveliso yeemoto ezikumgangatho ophezulu kwihlabathi," kutsho uLi.
Inkampani yakwaVolvo ivelisa iimoto eziphambili, iiloli kwakunye noogandaganda bokulima, noomatshini bokuvuna nokulima. Le nkampani yaseChina kudala yavelisa iimoto kwaye iphakathi kooxholovane bokuvelisa iimoto kwihlabathi.