UMphathiswa weSebe leNtsebenziswano kuRhulumento neMicimbi yeMveli (Cogta) uVelenkosini Hlabisa uthi iSebe lakhe libonelele ngemali engaphaya kwebhiliyoni yeerandi ukunceda oomasipala kumaphondo ohlukeneyo athe athwaxwa ziintlekele.
Image: File
ISebe leNtsebenziswano kuRhulumento neMicimbi yeMveli phantsi koMphathiswa uVelenkosini Hlabisa likhuphe imali engaphaya kwebhiliyoni yeerandi (R1.44 billion) ukunceda ooMasipala abahlaselwe ziintlekele zemozulu.
Ingxelo ithi le mali iza kuthunyelwa kooMasipala abangamashumi amathandathu kumaphondo amahlanu welizwe loMzantsi Afrika.
Ilizwe loMzantsi Afrika lihlaselwe ngamandla yimozulu enezandyondyo nomoya obangele umonakalo omkhulu kumakhaya amaninzi weli. Iphondo laseMpuma Koloni kwakunye nephondo laKwaZulu-Natal ngawona athe agagana nezona ntlekele zikwizinga eliphezulu.
Kuthwa le mali iza kuthunyelwa kwaba Masipala kusetyenziswa iinkonzo zeNational Disaster Management Centre neliziko elijongene neentlekele kuzwelonke.
Oku kwenzeka emva kokuba iintlekele ezo zithe zaqinisekiswa ukuba ngenene zikufanele ukubizwa ngokuba ziintlekele.
UMphathiswa uHlabisa uthethe oku ngethuba ethetha namajelo eendaba ePitoli ecacisa indlela ezakusebenza ngayo le mali. "Ngoncedo leli ziko lethu liyiNational Disaster Management Centre sele siqalile ukukhupha imali eya kooMasipala abathile, ngoko ke sithetha ngento esele isenzeka," kutsho uHlabisa.
UHlabisa uthi ngabantu abangamashumi amane abathe babhubha kweli ngenxa yengxaki yezandyondyo zemvula kunyaka mali u2024/25.
"Abantu ababhubhileyo ngenxa yezi zandyondyo babhubhe kakhulu kwinyanga yoMnga, iphondo laseKZN lelona lithwaxeke ngamandla yile meko, uninzi lwabantu ababhubhileyo bakwela phondo," kutsho uHlabisa.
UHlabisa uthi kweyoMnga wonyaka ka2023 ngabantu abangamashumi amabini anesithathu ababhubhe ngenxa yezandyondyo zemvula. UMasipala waseChris Hani kwiveki ephelileyo uhlaselwe kanobom ziintleke ezibangele ukuwa kwezindlu, ukuqhawuka kombane nokonakala kweendlela.