Iteksi ebizele ngabantwana besikolo ebimiswe ngamagosa ezendlela kuMasipala oMbaxa iBuffalo City.
Image: Uthathwe kwividiyo
Babini abaqhubi beeteksi abavalelweyo kule veki emva kokuba bethe babhaqwa belayishe abantwana bezikolo ezohlukeneyo zaseMonti abangapha komlinganiselo ngethuba bebasa ezikolweni zabo.
Aba baqhubi babanjwe ngamaGosa ezeNdlela kaMasipala oMbaxa iBuffalo City (BCMM) kule veki, nalapho omnye ebebanjwe ngentseni yangoLwesibini logama omnye ebanjwe ngentseni yangoLwesine.
Ngokwengxelo yalo Masipala, ezi teksi zibanjwe kwindlela enye ephakathi koMdantsane kwakunye neMonti, ngethuba amaGosa esenza ugqogqo kwindlela uR102. Ngaphakathi kwenye yezi teksi zaba baqhubi ababini ababanjiweyo, bezilayishe abafundi abangamashumi amabini anesithandathu (26).
Eli phephandaba lizibonile iividiyo ezimbini zeeteksi zohlobo lweQuantam ezilayishe aba bantwana badlule kwinani elifanelekileyo. I-BCM ithi zizonke iimoto ezithe zathathwa ngamaGosa ngenxa yokungahambisani nemithetho yezendlela zilithoba (9).
Iteksi ebizele ngabantwana besikolo ebimiswe ngamagosa ezendlela kuMasipala oMbaxa iBuffalo City.
Image: Uthathwe kwividiyo
Esi sehlo seeteksi ezilayisha abantwana abangapha komlinganiselo asiqali ukwenzeka eMonti, kunyaka ophelileyo besenzekile njengokuba siphinda nje nakulo unyaka nokubonakalisa ukungayaleki kwanokungafundi sifundo kwabaqhubi bezithuthi ezithutha abantwana.
Isithethi saseBCMM uSamkelo Ngwenya uqhwabele izandla la maGosa esithi umsebenzi abawenzileyo uyancomeka kwaye mkhulu kuba oku kusindisa ubomi babantwana. "Le nto inobungozi kakhulu kwaye ayintlanga, futhi asiqondi ukuba abazali bayayazi le nto yenzeka ebantwaneni babo eyokunyomfelwa, kungoko sibabongoza babeliliso ngamaxesha onke – umzali amazi ukuba umntwana uya njani esikolweni. Sikwabongoza nootitshala bazichaze ezi meko," utshilo uNgwenya.
INkumanda yezoThutho yaseBCMM uQuinton Chetty utyityimbisele umnwe bonke abaqhubi abalayisha abantwana nabantu abangapha komlinganiselo wesithuthi esithi baza kujongana nengalo yomthetho. "Ukulayisha ngaphezulu ayintuba akuvumelekanga qha kukwabeka nobomi babantu ebungozini. Umthamo ogqithiseleyo emotweni ungabanalo igalelo elibi kakhulu emotweni enode idale ingozi," utshilo uChetty.
IGosa eliphezulu uW. Zweni uvule ityala kwisikhululo samaPolisa esiseNU 1 eMdantsane, eMonti.
Related Topics: