Inzwakazi yaseMthatha kumdlalo kamabonakude Uzalo

Inzalelwane yaseMthatha, eMpuma Koloni, nesele izenzele igama kumabonakude iza kudlala kumdlalo kamabonakude kuSABC 1 othi Uzalo.

UZukisa Matola uza kudlala indawo kaNomaRussia Mkabile, odlamkileyo kwaye ongoyiki bani, nobukho bakhe buza kutsala umdla wabaninzi.

UNomaRussia ungumnini wezithuthi zikawonkewonke, kwaye unolwazi oluninzi ngeli shishini. Ungowasetyhini okufumanayo oko akufunayo, nokuba ixabiso lako lithini na.

Umbuzo ngowokuba kazi ufuna ntoni? Impendulo yoko inye, ufuna uPrince, kwaye isincwaso sakhe ngakuPrince singanobungozi.

Kulo mdlalo uNomaRussia uza kusebenzisa amandla, inkohliso, nolawulo, ukwanelisa iinkanuko zakhe.

UMatola uzenzele igama kwimidlalo kamabonakude equka iTsha Tsha, Generations, Skeem Saam, Shreds and Dreams, Home Affairs, Sokhulu & Partners, The Qeen, kwaneminye imidlalo.

Ungaphoswa ngulo mdlalo uthi Uzalo, ngecala emva kwentsimbi yesibhozo ngokuhlwa (20:30) kuSABC 1.