Ithuba lokwazi ngomlando ocebile wezigodlo ezisogwini lweKZN
EBANTWINI abalandela inkolo yobuKhrestu, inkathi yePhasika isho impelasonto yokudumisa nesikhumbuzo sokufa nokuvuka kweNkosi yabo enguJesu Khrestu.
Amabandla avame ukwenza izinkonzo ezinkulu zePhasika, okuyaye kugqame kuzo eyamazwi ayisikhombisa, eba ngoLwesihlanu lwePhasika.
Njengoba lezi zinkonzo zihlanganisa iziyingi namabandla ahlukene, amakholwa ahambela izindawo ezehlukene, kokunye eziqhelile emakhaya.
Usuyancipha umkhuba wokulala ezikoleni nasemahholo omphakathi, obekuvame ukwenzeka kuqala, amakholwa asekhetha ukufuna izindawo azolala kuzo njengamahhotela, amaB&B, ama-lodge nezinye izindawo ezilalisa izivakashi.
Ukuheha amakholwa, uphiko lwezokuvakasha eningizimu yogu KwaZulu-Natal, iSouth Coast Tourism and Investment Enterprise, lwethule uhlelo lwezokuvakasha olugxile ekufundiseni ngomlando wamabandla akulesi sifunda.
Ngenxa yomlando ojulile ngezimishini ezisogwini oluseningizimu, kusungulwe lolu hlelo lokufundisa ngomlando ezivakashini, olubizwa ngeMission Tourism Route.
Ngokuvakashela lezi zindawo, okubalwa kuzo isigodlo sezindela, iCapuchin Adoration esisePumula, izimishini ezisoShabeni iMaris Stella ne-Assisi Mission at Oshabeni nemishini iMaria Trost eSt Faith, izivakashi zizobe zizibonela ziphinde zifundiswe ngomlando wazo.
“Sesikubonile sakucubungula ukuthi bayanda abantu abanentshisekelo yokwazi umlando ngezimishini eziningi ezisogwini oluseningizimu nesifundazwe.
Ukwethulwa kweMission Route akulethi nje kuphela uhlaka olusha lwezokuvakasha esifundeni sethu kepha kuvula namathuba okuthuthukisa umnotho wezokuvakasha ezindaweni ezisemakhaya,” kusho isikhulu esiphezulu seSouth Coast Tourism and Investment Enterprise, uPhelisa Mangcu.
Lolu hlaka lwezokuvakasha lugxile ebandleni lamaRoma aKhatholika, kusuka ngeminyaka yo-1880 ngenkathi kufika kule ndawo indela yesilisa yase-Austria, uFranz Pfanner, owayehambisana nezinye izindela zesilisa ezingu-30, ngemva kweminyaka emibili besungule imishini nesigodlo eMariannhill, eThekwini.
Izivakashi ezizobe ziyingxenye yeMission Route ngeke zifundiswe ngomlando kuphela kodwa zizothola nethuba lokubona ubuhle bezindawo ezehlukene ezisogwini oluseningizimu, njengomfula uMzimkhulu.
Kuleli Phasika, amakholwa azobe esogwini oluseningizimu neKwaZulu-Natal angenza okwehlukile ngokufunda ngomlando wokufika kwenkolo yobuKhrestu kule ndawo.