UMCULI wama-piano uScotts Maphuma
Image: FACEBOOK/SCOTTS MAPHUMA
UMCULI wama-piano oshisa izikhotha uScotts Maphuma ogama lakhe langempela uMpho Innocent Lebajoa, udume emculweni ngezingoma okukhona kuzona ethi Biri Marung, iPhuthuma ayishaya noCyfred nethi Uyaphapha Maarn kaTNK MusiQ, useziphendulele ebantwini abamsola ngokuba nempakamo kubalandeli abamjabulelayo.
Lokhu kususwe wukusabalala kwe-video esemcimbini lapho okuthe esephuma e-stage, kwakhona umlandeli wesifazane oze kuyena ethi uyomjabulela ngokumanga, uMaphuma wamchizela wasuka lapho wazihambela, eshiya lo mlandeli ekhexile futhi kubonakala ukuthi uphoxekile ngokwenziwe yilo mculi.
Abantu abaningi basigxekile isenzo salo mculi, kangangokuba ugcine esenikizwa unontandakubukwa wemigosi uSlik Talk, owenze ama-video awafake kwi-channel yakhe yakuYouTube, ekhwele adilika kuScotts, ebabaza impakamo yakhe nakubize ngokudelela abalandeli.
Akuphelanga sikhathi esingakanani, uScotts waziphendulela ngombhalo ku-Instagram ukuthi sekungokokugcina manje ephawula ngalezi zinsolo zasolwa ngakho.
Uthe abantu kumele bamukele ukuthi akayona imali ngeke athandwe yiwo wonke umuntu, futhi ngeke ekwazi ukumelana nengcindezi yokungakwazi ukuphila impilo yakhe ngendlela afisa ngayo.
UMBHALO kaScotts Maphuma eziphendulela kwabamsola ngempakamo
Image: FACEBOOK/SCOTTS MAPHUMA
“Ngeke ngikwazi ukuphila impilo yami yangasese ngokungakhululeki, kangangokuthi angisakwazi ngisho ukuya ezitolo ngiyothenga isicathulo, into ebengikwazi ukuyenza ngingabi nankinga eminyakeni edlule. Manje sekumele ukuthi njalo lapho engihamba khona, ngihlale ngikhathazeke ngabantu abazoqhamuka bacele ukushutha nami,” usho kanje.
Eqhuba, uthe akakunqabi ukujabula nabalandeli bakhe noma ashuthe nabacela ukushutha naye, kodwa inkinga yakhe wukuthi ngeke akwazi ukuhlale ewuScotts Maphuma konke lapho ehamba khona, ezeseka ngokuthi naye uyadinga isikhathi sokuba wumuntu ojwayelekile.
“Manje uma ngitshela umuntu ukuthi angikho esimweni esihle sokushutha naye, sengiyedelela ngalokho? Kungani kumele nginike abantu isikhathi sami namandla ami ngenkani ngenxa yokuthi ngiyilomuntu engiwuyena manje? Ngiyaxolisa, ningamane niqede ngodumo lwami ukuze ngikhululeke kukho konke lokhu,” kusho uScotts.