UTHABO Bester, noDkt Nandipha Magudumana Isithombe: SITHUNYELWE
IJAJI leNkantolo eNkulu yeGoli, uStuart Wilson lisichithile isicelo esiphuthumayo sikaThabo Bester, noDkt Nandipha Magudumana sokuvimba ukukhonjiswa kweqophamlando lakuShowmax, iTracking Thabo Bester.
Iqophamlando eliyiziqephu ezine, linaba ngezinsolo ezibhekene nabo bobabili njengoba behamba icala mayelana nokweqa kukaBester ejele. Kulindeleke ukuthi isiqephu sokuqala siqale ukukhonjiswa kusuka ngo-4 ntambama ngoLwesihlanu.
AbeShowmax besiphikisile isicelo ngoba bekholwa wukuthi abasolwa babhekene nezinsolo ezibucayi futhi abantu banelungelo lokuthola kabanzi ngazo bese benza eyabo imibono.
Ekuqaleni kwesonto Isolezwe libike ukuthi ngemuva kokuthi abakwaShowmax bememezele izindaba zokulisakaza ekuqaleni kwesonto eledlule, abameli babasolwa bobabili bakhiphe incwadi evimbela isiteshi ukuthi sisakaze noma yini ethinta icala ngoba bethi abatshelwe ngohlelo.
Emaphepheni abhekiswe kwiMultiChoice, neShowmax, uDkt Magudumana ufuna abameli bakhe babuke iqophamlando ukuze babone ukuthi akukho yini ukuhlukumezeka kwamalungelo akhe okwenziwe kulo.
Ngokusho kwabameli bakaThabo Bester, umsolwa ukhala ngokuthi kazange abanikeze ilungelo lokukhiqiza iqophamlando ngempilo yakhe nokuzosakazwa kwalo emphakathini.
Ngokwesitatimende esithunyelelwe abezindaba, abakwaShowmax badalule ukuthi bazoqhubeka nokusakaza iqophamlando ngoba abantu abanelungelo lokwazi ukuthi kwenzekalani baze baboshwe.
Related Topics: