Liqale kuleli sonto isasasa lokuvota kwi-Big Brother

Nokubongwa Phenyane|Published 1 month ago

UNSUKU no-Uyanda bangabanye babaqokiwe ukuthi bangase baphume endlini kaBig Brother kuleli sonto, nokuyisigaba esithakaselwa abaningi siphinde sidale nokungezwani endlini Izithombe: ZITHUNYELWE

UQALILE kuleli sonto umsindo owenza lube nokuthakasela nakakhulu uhlelo i-Big Brother-Mzansi njengoba ukuvotelwa kwabazophuma kuvuliwe.

Ngemuva kokuthi abasendlini beqokane bodwa ukuthi obani abafuna baphume, umethuli wohlelo uSmash Afrika, ube esememezela izindaba zokuthi ulayini wokuvota usuvuliwe, abantu bangaqala basindise abafuna baqhubeke nokubonakala ohlelweni.

Kwabaqokiwe kukhona u-Abobo (Abongile Salli) waseKapa, Bonnie B (Bongiwe Booi) waseGoli, Nate (Fortunate Setwaba) waseLimpopo, Savage (Hassaan Rigney) waseGoli, Nsuku (Nsuku Mabunda) waseLimpopo no-Uyanda (Uyanda Hlangabezo) waseGqeberha.

Kulaba oyedwa noma ngaphezulu nakanjani bazoya ekhaya.

Ngesonto eledlule, babe khona abaqokiwe kodwa akwangaphuma muntu.

Kulo nyaka lolu hlelo olunesiqubulo salo esithi Umlilo, izingxabano zibonakale ngosuku lwesibili njengoba intokazi yaseThekwini u-Ash-ley Ogle noBonnie B bebange indaba yokudla.

UBonnie B ngenye yezintokazi efike yazinikela ekhishini, ngokuphekela bonke abasendlini.

Kodwa lokhu kumdalele amanzi ngomsele njengoba ukungathuli kwakhe nokushayela abanye umthetho uma kuziwa emabhodweni, kumenzele amazinyo abushelelezi.

Emva kwephathi yangoMgqibelo, intokazi eyangena ngembobo yenaliti ohlelweni uNsuku ibe nengxabano noMandy Hagan eshubile kubangwa ukuthi uyadelela futhi akanazwelo.

Le ngxabano yenza indlu yahlukana phakathi, kwacaca ukuthi amaqembu abangani asemaningi.

NgoMsombuluko, uBig Brother, wenze into ebingalindelekile eyihlukanisa kabili imidlalo yalowo ozohola indlu isonto.

Injabulo ka-Uyanda isheshe yaphela njengoba ukuwina kwakhe isigaba sokuqala, kuqedwe uSipha Lee, okuyimanje uyazihola.

Ezinkundleni zokuxhumana abaningi bazwelane no-Uyanda njengoba ephinde waqokwa kwabanye abazophuma kuleli sonto.

Lokhu kwenze bambeka njengomuntu onebhadi njengoba nangeledlule ehluleke esethi uwinile kuyona imidlalo yabazohola abasendlini.

Kulo nyaka abantu okubonakala sengathi oyedwa wabo uzohamba nemali engu-R2 million, nabathandwayo kukhona insizwa yaseNquthu uSweet Guluva, Nsuku, Muzi-TheMbuzi, Tyrone no-Ash-ley Ogle.