UZanele Mbokazi-Nkambule esedlulile emhlabeni
Kugcine kumenele esibhedlela iParklands, eThekwini, umsunguli womcimbi amaCrown Gospel Music Awards, uZanele Mbokazi oshone ezintatha ngoMsombuluko.
Kwavela ukuthi uZanele uphethwe wumdlavuza wamaphaphu.
Umyeni wakhe uMbhishobhi Mpendulo Nkambule wenze isimemezelo ezinkundleni zokuxhumana ngokudlula emhlabeni kwale ngqalabutho ebisisakaza emsakazweni Ukhozi FM.
UNkambule uthe bayayibonga yonke imithandazo abayitholile ngesikhathi uZanele esagula.
Banxuse ukunikwa isikhathi njengomndeni ukwamukela okubehlele.
Umphathi woKhozi FM, uSbongi Ngcobo uthe uzifikele yena esibhedlela beyovalelisa kuZanele.
“Sibonga abalaleli boKhozi FM, ngokuhamba nathi kulolu hambo nithandazela uZanele, siduduze umndeni wakwaNkambule nowakwaMbokazi ngokubehlele,” kusho uSbongi.
UZanele uqale ukugula kusuka ngo-Ephreli okwakwenza kube nzima nokusakaza kangangokuba kokunye uhlelo lwakhe walushiya lwabanjwa wuThokozani MaMkhize Ndlovu.
Waze wacela imikhuleko kuFacebook ekhala ngakho belu ukugula.
“Hhayibo! Ngaze ngagula ekuseni. Iqiniso lithi anginawo umkhuhlane. Kusuka ngeSonto eledlule ngilwa nesibhobo, izwi elishayo libuye livuleke.
“Namhlanje ngize emsebenzini ngoba ngingcono, isibhobo bese sithulile, futhi nezwi selibuyile, weeeeeeee kwaqala phansi.
#ThandazaniBazalwane base #Eshilo, UJehova wethu indoda yempi. Akehluleki” kubhala uZanele.
Ngemuva kwalokho akaphindanga wabuyela emsebenzini futhi abaculi bowokholo nabefundisi bamhlelele imikhuleko eGoli naseThekwini.
Related Topics: