UMSAWENKOSI Mtolo ulale isibili ngoLwesine, losuku lokuqala lweMyLife Dusi Canoe Marathon, egwedla izinsuku ezintathu ukusuka eMgungundlovu kuya eThekwini Isithombe: DUSI TWITTER
LUSONGWE ngenothi eliphezulu usuku lokuqala lweMyLife Dusi Canoe Marathon, ngoLwesine, ingqwele yalo mjaho kwabesilisa, u-Andy Birkett, iphuma phambili ihlelwe ezithendeni nguMsawenkosi Mtolo olale isibili.
Lo mjaho wokugwedla izikebhe onedumela nogwedlwa izinsuku ezintathu, uqale eBishopstowe Hall, eMgungundlovu, wasongwa eNo.9 Bridge, phakathi KwaNyavu naKwaXimba.
NgoLwesihlanu, uzosongwa eNanda Dam, bese owamanqamu uphethwe ngoMgqibelo, eBlue Lagoon, eThekwini.
Nonyaka, lo mjaho ogwedla ngawedwa (K1) awuqalwanga eCamps Drift njengenjwayelo ngenxa yesimo esingagculisi sezinga lokugcwala komfula uMsunduzi okuvame ukuba uqalwe kuwo.
UBirkett ongumpetha ovikela isicoco nosenqobe lo mjaho amahlandla amaningi, uphume phambili ngesikhathi esingu-01:53:59, elandelwa nguMtolo endaweni yesibili ngesikhathi esingu-01:55:03, kwathi isithathu kwaba nguSandile Mtolo ngesikhathi esingu-01:57:17.
Kwabesifazane, kuphume phambili uChristie Mackenzie ngesikhathi esingu-02:12:57, elandelwa nguBridgette Hartley ngesikhathi esingu-02:26:47, isithathu kwaba nguJordan Peek ngesikhathi esingu-02:27:12.
Nakuba luselude ukhalo njengoba kusasele izinsuku ezimbili ziqede ukudlana imilala, kubukeka kuthembisa ngabagwedli abampisholo njengoba kwabayishumi abaphume phambili kwabesilisa, kubalwa phakathi kwabo uBanetse Nkhosea olale isihlanu, nensephe uThulani Mbanjwa olale isikhombisa.
Nyakenye, isithathu sathathwa nguNqobile Makhanya owayegwedla noSbonelo Khwela, isine sathathwa nguMbanjwa noMtolo.
Related Topics: