Umkhuhlane weentaka ubhaqwe kwigusha eNgilane nto leyo ebangele inkxalabo kumafama.
Image: iStock
Ukosulelana ngezifo kwizilwanyana zasefama yinto ekhoyo eyenzeka phantse yonke imihla nanjengoko zihlala zidibana kumanqanaba ahlukeneyo.
ISebe lezolimo eNgilane alivumi kuchaza igama lefama ekufunyenwe kuyo le gusha esulelwe ngumkhuhlane weentaka, kodwa bachaze idolophu ekufutshane iYorkshire.
Ingxelo yeBBC ithi igusha efunyenwe nesi sifo, kuquka neentaka ezisakrokrelwa ukuba zinesifo, zibekelwe bucala logama kusaqhutywa uphando olubanzi.
Oku kuthetha ukuba ukudibanisa izilwanyana ezihamba kwiindawo ezahlukeneyo kungabangela ingxaki kwezinye. Ngenxa yomkhuhlane weentaka kweli laseNgilane, sele kubulewe iintaka ezingaphezu kwesigidi ngelizama ukunqanda ukunwenwa kwesifo somkhuhlane weentaka. Ukusukela kunyaka ophelileyo amafama welizwe laseNgilane asebenze nzima ukuzama ukunqanda ukunaba komkhuhlane ezintakeni.
Amanye wamafama wela lizwe aphila ngokwenza ingeniso ngokuthengisa inyama yeentaka, uboya, amaqanda neentsiba zeentaka. UPhil Stocker nguSihlalo wombutho wamafama weegusha, iNational Sheep Association, kweliya laseNgilane.
"Ukudibanisa izilwanyana ezahlukeneyo kudala kuyingxaki, ngoko ke asikukhuthazi ukudityaniswa kwazo nokuba imeko injani, nokuba ziphilile okanye aziphilanga," kucacisa uStocker.
Umfama uTom Bradshaw uthi bayaluqonda uxinzelelo aphantsi kwalo amafama ngenxa yokufumaneka kwezilwanyana ezosulelwe ngumkhuhlane weentaka kwiindawo ezithile zaseYorkshire.
"Ukufumaneka komkhuhlane weentaka egusheni kumele ukuba kubangele inkxalabo kumafama weegusha kuba bekungalindelekanga oku," kutsho uBradshaw.
Ngonyaka ka2021 umkhuhlane weentaka ukhe wafunyanwa ebantwini kwela lizwe laseNgilane into engaqhelekanga.
Esi sisifundo kumafama onke ukuba ahlale eqaphela okuqhubeka kwimihlambi yabo nanjengoko kulula okosuleleka kwemfuyo.